CEBU - Mokabat sa P220 mil ang danyos sa naugdaw nga bodega ug duha ka panimalay sa sunog nga nahitabo sa Purok Talong New Ville Village barangay Cambaro dakbayan sa Mandaue kagahapon sa buntag.
Ang naugdaw mao ang panimalay ug bodega ni Steve Yu ug ang nakan-an sa kalayo mao ang mga panimalay nila ni Danny Omolon ug Helen Dimla.
Base sa imbestigasyon ni Mandaue City Fire Investigator SFO1 Roy Garcia nasuta nga nagsugod ang kalayo sa likod nga bahin sa refrigerator ni Steve Yu sa kusina ug dali kini nga mikatap sa tibook panimalay human sa usa ka buto nga milanog diin gidudahan nga usa ka LPG ang mibusikad.
Matud pa ni Mercy Yu (asawa ni Steve) nga dali mikatap ang kalayo sa palibot sa ilang panimalay gumikan sa stocks nga pintal alang unta sa pagpaayo sa ilang bodega ug panimalay.
Sa pagdako sa maong kalayo mitapon kini sa mga panimalay nila ni Omolon ug Dimla apan dali kini nga natabang sa mga residente sa maong dapit.
Nadawat sa kabomberohan ang alarma mga alas 6:00 kagahapon sa buntag ug gipaubos kini sa general alarm.
Nakontrolar kini sulod sa pito ka minutos ug walay gikatahong naangol ug nasamdan atol sa maong insidente (BANAT NEWS)