CEBU - Gihatagan og P1 milyon sa Department of Health (DOH-7) ang kagamhanan sa dakbayan sa Sugbu aron magamit sa programa bahin sa reproductive health, sumala ni Acting Mayor Michael Rama.
Kini bisan pa man kung ang City Council bag-o lang mipalabang og resolusyon nga kusganong nagsupak nga mapalabang ang nag-ung-ong nga Reproductive Health Bill.
Gipasabot hinuon ni Rama nga ang pagdawat sa kagamhanan sa dakbayan sa financial aid walay kalabotan sa kontrobersyal nga balaudnon.
Miingon si Rama nga kining kuwartaha gastuhon aron ipamalit og mga contraceptives sama sa condom, pills ug uban pang gamitonon sa artificial birth control.
Sa sayo pa mikisikisi ang tagdumala sa Human Life International (HLI) batok niining pagsagop sa mga kontraseptibo tungod kay dakong supak ang simbahan niini.
Matud sa country director sa HLI nga si Doctor Rene Josef Bullecer nga ang paggamit og contraceptive dili lang nahasupak sa pagtulun-an sa simbahan, makadaut pa sa panglawas.
Dugang ni Bullecer nga sila dunay mga kamatuoran usab nga ang nag-unang hinungdan sa breast cancer mao ang paggamit og contraceptive sa kababayen-an.
Tambag ni Bullecer ngadto sa mga magtiayon nga kung magplano sa pamilya mas maayong gamiton mao ang natural family planning method.
Kini tungod kay gawas nga walay side effect, ang maong buhat giingong nahiuyon usab sa pagtulun-an nga gitudlo sa simbahan. (BANAT NEWS)