P50M nga suborno imbestigahon

CEBU - Ang ubos balay balauranan mopahigayon og usa ka congressional inquiry karong Enero 5, 2009 kalabot sa giingong pagdawat og P50 milyones nga suburno sa pipila ka opisyal sa gobyerno nga nag-imbistigar sa kaso bahin sa ilegal nga drugas sa gitawag nga “Alabang Boys”matud pa ni Undersecretary Clarence Paul Oaminal sa Dangerous Drugs Board (DDB).

Matud pa ni Oaminal nga si Kongresista Antonio Cuenco sa Cebu City South District miawhag nga ipaubos sa lie detector tests sila si Philippine Drugs Enforcement Agency (PDEA) Director Dionesio Santiago ug si chief prosecutor Jovencio Zuño.

Sayo niini si Cuenco nagkanayon nga sila si Santiago ug Zuño kinahanglang mopadayag sa kamatuoran bahin sa miulbo nga isyu nga matud pa gilawgan og P50 milyones sa mga suspetsado ang pipila ka huwes sa Department of Justice (DOJ) aron maabsuwelto ang kaso sa mga suspetsadong nagtingkagol karon sa prisohan .

Alang kang Cuenco nga mas maayong ipakita ni Santiago ngadto sa publiko nga wala siya mamakak sa iyang pasangil nga ang taga DOJ midawat og P50 milyones nga suborno gikan sa Alabang Boys.

Nunot niini si Cuenco kinsa maoy vice chairman sa House Committee on dangerous drugs mibutyag nga karong Enero 5 sa sunod tuig sa alas 10:00 sa buntag ipahigayon ang maong congressional inquiry nga pangunahan ni Kongresista Roque Ablan sa Ilocos Sur kinsa maoy chairman sa dangerous drugs committee sa house.

Matud pa ni Oaminal nga seryoso ang alegasyon ni director Santiago hinungdan nga gikinahanglang ipamatuod kini niya sa mga magbabalaod buwahan to katangtangan og trabaho kadtong mga maghuhukom nga korap.

Midugang si Oaminal nga masuta usab diha sa maong imbistigasyon kun si Zuño tinuod bang nakadawat sa P50 milyones nga suburno.

Ang maong congressional investigation may labot sa tinguha untang pagpagawas gikan sa prisohan sa tulo ka mga suspetsado pinaagi sa pagbayad og P50 milyones, kinsa nadakpan atol sa usa ka buy bust operation didto sa Ayala Alabang, Muntinlupa City niadtong Sepotembre 20, 2008.

Sila mao si Richard Santos Brodett, Jorge Jordana Joseph ug Joseph Ramirez Tecson kinsa nadakpan sa akto nga nagloklok og 60 ka tabletas nga Ecstacy, mga ginagmay’ng putos sa cocaine ug mga linikit nga marijuana.  (BANAT NEWS)