CEBU – Patay ang usa ka batan-ong lalaki nga nagkalingaw og tan-aw sa telebisyon dihang gisekreto og lipot sa usa ka wala mailhing tawo dayung dul-it pagpusil kaniya makadaghang higayun diha sa bukirang bahin sa barangay Bae lungsod sa Sibonga niadtong Sabado sa alas 7 sa gabii.
Ang biktima nga patay diha-diha ug wala na madala pa sa tambalanan mao si Jovencio Bermejo, 24, walay klarong trabaho ug molupyo ra sa nahisgutang lugar.
Samtang sa paghimo ning balita wala pa mailhi ang suspek tungod kay matud ni PO1 Dante Mulo sa Sibonga Police dihang nahinabi sa Banat News nga sagad sa mga tawo sa maong lugar nga ilang gisukit-sukit ang pulos nangambot ug igo lang moingon nga wala sila makahibawo.
Subay sa imbestigasyon sa kapulisan, ang biktima nanan-aw og salida sa telebisyon sa pinuy-anan sa usa ka Celsa Ortiz ug diha maglingkod sa balkonahe.
Wala kini makabantay nga nisekreto og sulod ang suspek ug milipot sa luyo niini ug gidul-itan kini sa pagpusil makadaghang higayun sa bukobuko hinungdan sa kamatayon niini.
Sa pag-responde sa mga polis wala na ang suspek ug naabtan nalang ang biktima nga nagkulob sa salog ug naglunang sa iyang dugo.
Ang kapulisan naka-recover og duha ka kabhang sa bala sa kalibre .45 ug usa ka slug niini.
Dako ang pagduda sa kapolisan nga personal nga pagdumot ang motibo sa pagpatay sa biktima. –BANAT NEWS