Lawas sa nalumos naputos sa tunok sa tuyom, 'kit-an

CEBU – Naputos sa mga tunok sa tuyom ang kalawasan ug nakaangkon og daghang mga samad sa nawong ang patay’ng lawas sa usa ka 24-anyos nga lalaki nga napalgang patay diha sa barangay Molobolo sa lungsod sa Tuburan niadtong Sabado sa hapon.

Gidagsa na lang nga patay na sa lapyahan sa baybayon mao si Wendell Bonghanoy, 24, molupyo sa barangay Dapdap sakop sa maong lungsod.

Matud pa ni SPO1 Carlo Canseko imbestigador sa Tuburan Police Station sa dihang nahinabi sa Banat News, si Bonghanoy miuban sa iyang ig-agaw nga nagpahigayun sa iyang birthday party sa usa sa mga beach resorts sa maong dapit.

Apan nianang pagka-ala una sa hapon sa dihang nangahubog na ang grupo nikalit og barug ug mideretso og salom sa dagat si Bonghanoy bisan og nakainom na kini.

Usa sa iyang mga ig-agaw nga si Lolita Siquera mitug-an sa mga polis nga nakit-an pa nila si Bonghanoy nga gi-anod sa kusog nga sulog ug paglabay sa pipila ka minutos naunlod na kini ug wala na igkita og balik.

Tungod niini dali silang nangayo og tabang ug ilang gisubay ang dagat pagpangita ni Bonghanoy.

Apan sa pagka alas 3:00 na sa hapon nakit-an nila si Bonghanoy nga gidagsa sa bawod diha sa lapyahan ug patay na nga dunay daghang mga tinunukan sa mga tuyom sa kalawasan ug pangos sa lawas ug nawong niini nga daw gikuso-kuso sa ilawom.

Nasayran nga ang maong dapit daghang mga mahait nga bato nga gisalagan sad sa mga tuyom ug tungod sa pagkuso-kuso sa bawod dugang pa ang sulog sa dagat nabunal-bunal ang lawas niini sa maong mga bato maong nabulit kini og tunok sa tuyom.

Ang tuyom usa ka matang sa mananap sa dagat nga dunay mga tunok nga may hilo nga maoy gamiton niini isip depensa sa mas dagkong mananap sa dagat.

“Paghimulso gani nako natunok pod ko sa tuyom daghan kaayong mga tuyom anang lugara,” dugang asoy ni SPO1 Canseko.

Matud ni SPO1 Canseko ilang girekomendar sa kabanay nga ipa-autopsy pagtino kun wala bay foul play ang kamatayon niini, apan ang amahan ni Bonghanoy nga tanod usab sa barangay nga si Buenaventura wala motugot nga ipa-awtopsiya pa kini ug gidala ang patay'ng lawas sa ilang balay aron adto hayaon. ­–BANAT NEWS