CEBU - Gitinguha ni Konsehal Efren Herrera sa dakbayan sa Lapulapu nga ang higpit nga kampanya sa kapolisan batok sa mga bisyo sa kabataan pinaagi sa pagpatuman sa curfew karong sunod tuig 2009.
Si Herrera nga nahinabi sa Banat News miingon nga ang curfew maoy makapitol sa mga batan-on nga nabuang na sa dautang bisyo.
Matud pa ni Herrera nga ang mga menor de edad nga mointra sa mga bisyong dautan maoy maghatag og labad sa ulo sa mga otoridad ug sa sosyidad ilabi na kun makakat-on na kini sa pagbisyo nianang ilegal nga drugas.
Miingon si Herrera nga kun ikapatuman ang balaod sa curfew, may dakong kalagmitan nga dili na kaayo kahuygo sa dautang bisyo ang mga batan-on kay kinahanglang mopauli sila og sayo sa ilang balay aron nga dili hiabtan sa curfew.
Midugang si Herrera nga sa mga batan-ong bisyoso, ang tungang gabii maoy paborito nilang mga takna kay makahimo sila sa unsa mang krimin nga buot nilang buhaton.
Dugang pa ni Herrera nga pinaagi sa pagpatuman sa curfew dako kaayo ang kahigayonan nga masumpo ang dautang bisyo, dili lamang niadtong mga batan-ong nagtungha kundili lakip na usab niadtong mga out of school youths.
Miingon si Herrera nga nagtuo siya nga paluyohan sa iyang mga kauban sa konseho ang iyang mga laraw sanglit naglantaw usab sila sa kaayohan sa kabataan sa ilang dakbayan. (BANAT NEWS)