Cebu - Duha ka mga minor de edad namatay ug sobra sa usa ka gatus ang nalandig sa tambalanan sa diarrhea outbreak nga miigo didto sa lungsod sa San Francisco isla sa Camotes gikan lang sa milabay’ng bulan sa Nobiyembre ning tuiga hangtod karong bulana.
Gitug-an sa Municipal Health Officer sa San Francisco, Dr. Leo Velasquez sa dihang nahinabi sa Banat News ang duha ka mga namatay mao ang 16 anyos nga babaye nga molupyo sa Northern Poblacion ug namatay nga wala na ma-admit pa sa tambalanan niadtong milabay’ng bulan sa Nobiyembre.
Ang laing biktima mao ang 4 anyos nga batang babaye nga molupyo sa barangay Consuelo nga namatay paghiabot sa tambalanan ug wala na matabang pa sa mga doktor niadtong Disyembre 5.Gikonpirmar sab sa Nurse sa San Francisco District Hospital nga si Maribeth Avila nga gikan sa milabay'ng bulan sa Nobiyembre hangtod karung bulana subra sa usa ka gatus ang mga pasyente nga nasakit og diarrhea kon kalibanga sa ilang tambalanan apan kadaghanan niini nakagawas na sa tambalanan.
Gibutyag ni Avila nga pagkakaron duna na lay panagsa o tagsa o duha matag adlaw ang malandig karung semanahuna ug gihulagway niya nga ang unang semana sa Disyembre maoy labing daghan og pasyente nga nalandig sa tambalanan.
Si Dr. Velasquez mitug-an nga subay sa resulta sa ilang gihimong pagkuha og sample nga gipa-examine dinhi sa dakbayan sa Sugbu nasuta nga ang tinubdan sa tubig mainom maoy hinungdan sa bacteria nga mitakboy sa tubig mainom sa mga pasyente nga miresulta sa ilang pagkalibang.
Dunay lima ka mga barangay ang seryusong na-apektuhan sa maong diarrhea outbreak ug kini mao ang barangay Sta Cruz, Santiago, Monte Alegri, Consuelo ug Esperanza apan ang barangay Sta. Cruz maoy dunay pinakadaghan og mga molupyo nga apektado.
Sagad sa nalandig sa tambalanan tungod sa diarrhea nagpangedaron og 2 ngadto sa 5 anyos og ang uban mga edaran na.
Gitug-an usab ni Dr. Velasquez nga sagad sa tinubdan sa tubig sa mga molupyo sa ilang lugar naggikan sa puso, sapa ug tabay.
Nunot niini, gipasidan-an ni Dr. Velasquez ang publiko nga magmatngon aron malikay sa maong sakit pinaagi sa pagsiguro nga gipabukalan gyud ang tubig nga mainom niini. – BANAT NEWS