Kinatawo sa 2 ka dalagita gitilaan

Cebu - Usa ka steward sa nag-unang hotel dinhi sa dakbayan sa Sugbu nagtingkagol sa karsel sa Pardo Police Station human gireklamo nga “mitila” sa kinatawo sa duha ka dalaga ug nanghikap sa nagkadaiyang parte sa ilang mga lawas kagahapon sa kaadlawon diha sa Sitio Mayana, Cogon-Pardo.

Ang steward nga gikatahong pasakaan og kasong attempted rape giila sa kapolisan nga si Franklin Cabellon, 35, minyo ug nagpuyo sa nahisgutang lugar apan silingan sa mga biktima.

Samtang ang gitilaan sa ilang mga kinatawo ug gipanghikap ug gi-chekeninihan mao ang 21-anyos nga dalaga si Angel ug Marian, 21, kinsa taga Mindanao ug nagpuyo sa iyang higala sa maong lugar.

Matud pa ni SPO4 Edgar Abangan sa Pardo Police Station nga gikahinabi sa Banat News nga si Cabellon gikatahong nakasulod sa panimalay sa mga biktima human giguba niini ang bildo sa bintana.

Sa dihang didto na sa sulod ug nakatulog na ang mga biktima gumikan kay naka-inom nianang pagka-gabii apan gikatahong si Angel nga nag T-shirt ug nagsul-ob sa iyang underwear samtang si Marian walay sapot nga natulog nga nagbukot og malong.

Ang mga biktimang nahinanok sa pagkatulog gipahimuslan ni Franklin pinaagi sa pag-chekenini sa liog ni Angel ug pagtila-tila sa kinatawo niini sa makadaghang higayon, apil usab sa gitilatilaan sa iyang kinatawo si Marian ug gipanghikap-hikap ang ilang kalawasan.

Hinuon naputol ang yawan-ong laraw ni Cabellon human nakamata si Marian ug misinggit sa dihang nakita niini nga gitilaan ang kinatawo ni Angel ug ang naulahi nakamata usab.

Matud pa ni SPO4 Abangan nga posibleng mag-atubang og attempted rape si Cabellon human usab mibahad ang mga biktima nga mosang-at og reklamo.

Dugang pa ni SPO4 Abangan nga ang inahan ni Cabellon nga wala magpaila mibutyag nga nag-videoke ang mga biktima, kabanay, higala apil na ang iyang anak diin ang mga biktima pwerting seksiha nga nagpakigol kini og short nga nagsayaw-sayaw pagka-gabii niadtong Martes.

“Lalaki nang akong anak unya pwerti mang pakigol sa mga babaye nga nagpabigang nagsayaw-sayaw natural lang nga maibog ang akong anak lalaki gud na,” sumala pa sa inahan nga nang-rason ngadto sa kapolisan.

Sa report sa dyHP, ang inahan   ni Angel nagkanayon nga iya gyud nga nakit-an sa duha niya ka mga mata sa iyang paglili sa lawak human misinggit ang iyang anak nga gitilatilaan ang kinatawo niini ug gani hapit na unta lugosa ni Cabellon apan nakapangayo lamang og panabang.

Si Cabellon sa dihang nakalitan sa presensya sa inahan sa biktima daling midagan nga hubo ang tibuok lawas   nga milayat sa bintana.

Apan ang iyang mga sapot nahibilin sa panimalay hinungdan nga gi-turn-over sa mga tagbalay ngadto sa kapolisan ang itom nga brief, T-shirt, ug maong nga short, ingon man identification card niini.

Hinuon si Cabellon nadakpan sa gipahigayong follow-up operation sa miscellaneous team sa Pardo Police Station ingon man mga barangay tanod didto na sa panimalay niini human mailhi pinaagi sa ID.

Ang biktimang si Angel matud pa gikan pa sa Singapore ug mipauli dinhi sa Sugbu aron sa pagtambong sa birthday party sa iyang amahan niadtong Martes sa gabii.

Si Cabellon kinsa ilang silingan ug amigo sa iyang amahan didto usab sa ilang panimalay nga miapil sa pag-inom-inom apan mibalik kini ug gisaka ang mga biktima. – BANAT NEWS