Mananagat giluba sa kauban

Cebu - Patay ang usa ka mananagat human kini giunay og dunggab sa laing mananagat nga iyaha rang silingan ug kauban sa inom diha sa sitio Looc Poblacion lungsod sa Argao niadtong alas 11:00 sa milabay'ng gabii.

Ang biktima nga dead on arrival sa tambalanan mao si Arnel Samat Rufo, 37, usa ka mananagat ug molupyo sa nahisgutang lugar samtang ang suspek nga iyaha ra usab nga silingan mao si Raymund “Alyas Cocoy” Allawan.

Matud ni PO1 Bernie Lao sa Argao Police dihang nahinabi sa Banat News ang biktima ug suspek uban sa ilang mga higala nag-inom sulod sa balay sa suspek uban sa usa ka higalang German national nga naila lang sa pangalan nga   Albert nga maoy migasto sa inom.

Gikatahong mibiya ang langyaw uban sa usa ka Michael Etac aron pagpalit diha sa gawas apan sa ilang pagbalik nakit-an nalang nila nga nagkadugo ang biktima ug nagpakitabang.

Ang biktima   gideklarar kini sa mga doctor nga dead on arrival gumikan sa samad dinunggaban sa tiyan, ubos nga bahin sa tuong bahin sa ilokan ug bagtak. – BANAT NEWS