Cebu - Gihangop ni Cebu City Councilor Arsenio Pacaña ang lakang ni Presidente Gloria Macapagal Arroyo sa dinaliang pag-certify sa balaudnon nga mag-increase sa deposit insurance coverage sa Philippine Deposit Insurance Corporation (PDIC).
Sa nahisgutang balaudnon himoon na unyang P500 mil ang deposit insurance coverage sa PDIC gikan sa kasamtangang P250 mil.
Matud ni Pacaña nga tukma ang maong balaudnon tungod usab sa nahitabo sa pipila ka mga bangko sa nasod nga nideklarar og bank holiday.
Partikular na niini ang mga bangko nga ubos sa Legacy Group of Companies sama sa Pilipino Rural Bank, Philippine Countryside Rural Bank ug uban pa.
Ang konsehal nga maoy chairman sa Committee on Trade and Commerce sa City Council niingon nga ang pagpataas sa deposit insurance usa ka lakang paingon sa maayong direksyon.
“Maayo na kay ang P250,000 that was long time ago ba, it answered the problems nianang mga bulilyaso sa bangko,” sumala ni Pacaña.
Nasayran nga Senate Committee on Finance nga gipanguluhan ni senador Edgardo Angara nagdali usab nga mapasar ang nahisgutang balaudnon.
Gani ang komitiba ni Angara nisubmitir na og committee report nga nipabor sa pag-usab sa charter sa PDIC pagpataas sa deposit insurance coverage.
Matud sa konsehal mopalabang siya og resulusyon nga magsuporta sa pagpalabang sa nahisgutang proposed measure.
Basi sa proposal, ang P250 mil abagahon sa PDIC samtang ang nahabiling katunga abagahon usab sa nasudnong kagamhanan.
Apan ang tanang maximum deposit insurance coverage itugyan na sa gobiyerno ngadto sa PDIC human unya sa unom ka tuig.
Sama kang Angara nagtoo si Pacaña nga ang maong lakang magpabalik sa pagsalig sa mga depositor sa banking system sa nasud. – BANAT NEWS