Depositor tabangan sa CH -- Rama

Gipasalig sa kagamhanan sa dakbayan sa Sugbu pagtabang sa mga depositor nga makuha ilang gideposito nga kuwarta diha sa mga bangko nga nag-bank holiday.

Partikular na niadtong mga depositor nga mga molupyo sa siyudad nga anaa pa sa kalibog kun kinsay ilang maduol nga makatabang pagbawi sa ilang kwarta.

Gimanduan na ni acting Mayor Michael Rama si kanhi Konsehal Manuel Legaspi nga maoy moatiman sa mga kliyente sa mga bangko nga nag-bank holiday.

Sa samang higayon giawhag usab ni Rama ang mga sakop sa Integrated Bar of the Philippines (IBP) nga motanyag sa ilang serbisyo.

“Matters like this the IBP should come in pro bono or whatever will be the arrangement between the clients,” sumala ni Rama.

Gusto usab sa acting mayor nga manginlabot si Konsehal Gerardo Carillo sa problema sa mga depositors tungod kay sama kang Legaspi kini usa usab ka abogado.

Nasayran hinuon nga ang mga bangko nga ubos sa Legacy Group nga nag-bank holiday gipaubos na sa “receivership” sa Philippine Deposit Insurance Commission (PDIC).

Apan wala pa matino sa mga depositor kun kanus-a sugdan sa PDIC ang pagbayad sa na-insured nga kwarta gikan sa nanira nga mga bangko.

Butang nga gikasagmuyo ni Rama human pasaligi ang mga kliyente nga mabawi ang ilang gidiposito nga kwarta.

“Why are they assuring and then there is no action in their assurance, these are the things that the City government can come in,” dugang pamahayag ni Rama.

Sa samang higayon gitahasan usab sa acting mayor si Legaspi sa pagpakigtagbo sa Kapisanan ng mga Brodkaster ng Pilipinas (KBP) Cebu Chapter labot sa maong isyu.

Gustong masayod si Rama kun gituman ba sa mga sakop sa media ang gipasalig niini pagtabang og sulbad sa maong problema.