Gikan namista sa balay sa huwes gipatay

Giatangan sa dalan ug gipusil-patay ang usa ka lalaki nga gikan nga namista sa pinuy-anan sa usa ka huwes diha sa bukirang bahin sa barangay Colawin lungsod sa Argao niadtong Sabado sa alas 7:00 sa gabii.

Ang biktima mao si Lilebeth Padigos, molupyo sa barangay Canhaga lungsod sa Sibonga.

Matud ni PO1 Benjamen Gerozaga sa Argao Police dihang nahinabi sa Banat News ang biktima gikan namista sa panihapon sa pinuy-anan ni Judge Veronico Sardoncillo nunot usab sa kapistahan sa maong lugar ug pagkahuman nidiretso kini sa paglakaw.

Paglabay sa pipila ka gutlo mao nalay nabati nila ni kagawad Gumercindo Sarona, chairman sa committee on peace and order sa konseho sa maong barangay ang buto-buto sa armas.

Inabagan sa mga tanod, ang kagawad miadto sa dapit gibana-banang 200 metros gikan sa pinuy-anan sa huwes ug sa basketball court nakit-an nalang ang biktima nga nagbuy-od na sa dalan nga nagkadugo ug dunay samad pinusilan sa walang bahin sa nawong niini.

Gisuwayan unta nila pagdala sa Isidro Kintanar Memorial Hospital sa lungsod sa Argao ang biktima apan gideklarar kini sa mga doctor nga dead on arrival (DOA).

Ang kapulisan padayun pa sa ilang imbestigasyon pagtumbok sa suspek ug motibo sa krimen apan nakasugat kini karun og gamay’ng kalisdanan sanglit wala may bisan usa ka saksi ang nipakita og interes pagkooperar.