Gikan nanabo gi-ambush 1 patay

Usa ang patay ug laing duha ang naangol sa pagpamanhig sa armadong mga lalaki sa mga tawo nga paingon nga mamauli gikan nanabo sa bukirang bahin sa barangay Lower Langin lungsod sa Ronda niadtong Sabado sa alas 5:30 sa hapon.

Ang biktima nga patay diha-diha human mabulit sa samad pinusilan ang ulo ug kalawasan mao si Ricardo Panto, 28,molupyo sa barangay Cambanog lungsod sa Dumanjug.

Samtang ang duha ka kaubang silingan nga samaron usab mao sila si Nicanor Niez, 26, ug Juan Estilloso. Wala pa mailhi ang mga responsable.

Matud ni PO1 Benedecto Rubia sa Ronda Police dihang nahinabi sa Banat News si Panto nakaangkon og samad pinusilan sa bukobuko nga nilapos sa dughan ug laing upat ka samad pinusilan sa ulo ug pagka-ugma na sa buntag naugkat ang patay’ng lawas niini sa mga polis.

Gikatahong human sa pagbuto-buto nag-iyahay og panagan ang mga kauban niini apil na ang mga babaye gikan nanabo sa sitio Lusno.

 Si Estilloso nakaangkon og samad pinusilan sa tiil samtang samad pinusilan sa abaga nga nilapos sa dughan ang naangkon ni Niez apan bisan samaron nakahimo pa sila pagdagan sa kabalayan ug nagpatabang paghatod sa tambalanan.

Matud ni Rubia giatangan ang mga biktima sa dulhugon nga bahin sa dapit duol sa usa ka humayan sa gibana-banang sobra sa tulo ka mga armadong lalaki.

Ang kapulisan naka-recover sa crime scene og duha ka buhing bala sa 7.62 millimeter sa M-14 Rifle, tulo ka kabhang sa bala sa Carbine, upat ka kabhang sa kalibre .45 ug laing tulo ka kabhang sa 9mm .

Ang kapulisan sa Ronda padayun pa sa imbestigasyon pagtumbok sa mga suspetsado ug motibo apan gihimakak nilang mga sakop sa rebeldeng pundok ang namanhig.