CEBU - Mikunhod karong tuiga ang gidaghanon sa mga kaso sa ilegal nga drugas nga nasang-at ngadto sa piskalya itandi sa miaging tuig. Apan misaka ang gidaghanon sa krimen sa siyudad tungod sa krisis sa nasud.
Ang Administrative officer sa Cebu City Prosecutors Office, Assistant city prosecutor Aida Adeluisa Tan nagkanayon nga 30 porsiyento ang pagkunhod sa mga kaso sa ilegal nga drugas nga nasang-at sa ilang buhatan karon tuiga.
Matud pa ni Tan nga niadtong miaging tuig, gikan sa bulan sa Enero hangtod sa bulan sa Nobiyembre, adunay 772 ka mga kaso may kalambigitan sa ilegal nga drugas samtang karong tuiga, sa susama gihapong mga bulan, 558 lamang ang napasakang kaso sa piskalya.
Nagtuo si Tan nga posibleng mi-epikto ang information and dissimination campaign sa kapolisan batok sa ginadiling drugas.
Apan 15 porsiyento ang pagsaka sa kaso sa mga krimen dinhi sa Sugbu niining tuiga.
Niabot og 3,082 ka mga kaso sa nagkadaiyang krimen sama sa tulis, kawat, labni, lungkab ug pagpatay, ang nasang-at sa ilang buhatan gikan sa bulan sa Enero hangtod sa Nobiyembre ning tuig mas taas itandi sa 2,737 sa miaging tuig.
Ang tumang kawad-on sa katawhan tungod sa ekonomikanhong krisis sa nasud ug sa kalibutan mao ang gituohan ni Tan nga rason sa pagsaka sa crime rate dinhi sa siyudad. – BANAT NEWS