Nagtangkil og pugakhang gipriso

CEBU - Gibalhog sa prisohan ang usa ka minor de edad nga miyembro sa usa ka gang ,human kini sikopa sa kapolisan kay nagpabansiwag sa gitangkil niyang pugakhang didto sa sitio Agbate, barangay Pacnaan, Mandaue City sa milabay’ng gabii.

Si PO2 Retchie Ondo sa kapolisan sa Presinto 3 sa Basak Police Station miila sa dinakpan nga usa lang ka Jake (bansagon gipugngan), 16, kansang kauban sa usa ka Jomar ug pulos giilang mga sakop sa gang sa mga batan-on sa ilang lugar.

Matud pa ni PO2 Ondo nga nagpatrolya sila niadtong higayona dihang maoy nasigpatan nila si Jake nga naglakaw ug yano ra kaayong nagdala sa armas nga walay lisensya uban kang Jomar.

Apan dihang gihunongan nila kini mikaratel og panagan ang duha apan si Jake wala makaikyas kay nasirkulohan dayon sa mga otoridad.

Matud pa ni PO2 Ondo nga gigukod si Jomar sa grupo nila ni Chief Inspector Eddie Rocamora ug mga sakop sa Mobile Patrol Group (MPG) apan maayong pagkatago niini ug wala na gyud igkita sa kapolisan.

Gitataw ni PO2 Ondo nga ang 16 anyos nga dinakpan ilang gitanggong karon sa ilang detention cell ug gihikay na ang kaso nga paglapas sa Republic Act 8294 kon ilegal nga paghupot og armas de fuego. – BANAT NEWS