Soc midupa sa isyung overpricing

CEBU – Gidepensahan pinaagi sa panghimakak ni Mayor Socrates Fernandez ang mga pasangil nga may overpricing nga nahitabo sa mga gipamalit nga mga uniporme ug ekipo para sa usa ka departamento sa City Hall.

Kini may labot sa usa ka privilege speech ni Vi ce Mayor Lani Abarquez niadtong Martes atol sa sesyon sa konseho nga miyagyag sa giingong kahiwiang nahimo sa pipila ka opisyal sa kagamhanan sa siyudad pinaagi sa giingong pagpa-overprice niini sa gipamalit nga mga butang sa siyudad ug nag-awhag kang Mayor Fernandez sa dili pagpaturagas og pirma ilabi na sa mga voucher alang sa mga pamalitong mga butang.

Ang kasayorang giyagyag sa hawanan sa konseho ni Abarquez iyang kinutlo sa taho nga gitunol kaniya gikan sa hepe sa Civil Security Unit nga si Rogelio Villaver kinsa giingong maoy nakadiskobre sa gipaburot nga prisyo sa gipamalit nga mga ekipo ug uniporme alang sa Talisay Rescue Emergency Action Team (TREAT).

Gumikan sa maong isyu mihiwasa si Mayor Fernandez ug dihadiha mipatawag dayon og miting sa mga hepe sa matag departamento sa City Hall kagahapon sa buntag.

Gibutyag ni Fernandez sa Banat News nga aduna silay controller nga iyang gisaligan, ug una siya mopirma sa mga voucher iyang sigurohon nga may pirma kini ni Ritchel Bacaltos nga maoy city administrator.

Si Bacaltos usab kinsa usa sa lima ka giingong gikiha ni Villaver ngadto sa Visayas Ombudsman   gumikan sa giingong kahiwian nga overpricing, lig-on usab kaayo sa iyang panghimakak sa maong pasangil.

Si Bacaltos mibasol kang Vice Mayor Abarquez tungod sa matud pa kapakyas niini sa pagsusi sa maong isyu nga unta bug-at ug seryuso man kining maong pasangil nga makadaot kaayo sa iyang pagkatawo.

Iyang gisumbalik ang pasangil ngadto sa bise mayor nga matud pa adto manukad ang pagpahigayon og canvass sa ma butang palitonon sa mga buhatan diha sa City hall.

Hinuon midugang si Bacaltos nga wala niya kahadloki kining maong isyu ug andam siyang moatubang bisan asa kay may giandam siyang tubag sa higayong ligiron siya og imbistigar sa Ombudsman. – BANAT NEWS