4 buses idugang sa Libreng Sakay program sa Mandaue

CEBU, Philippines — Upat ka bus ang idugang sa Libreng Sakay program sa Dakbayan sa Mandaue diin ang siyudad nisuway sa paggamit og electric vehicles.

Kagahapon nagpahigayon og dry run ang kagamhanan sa siyudad ubos sa pagpangulo ni Mayor Thadeo Jovito “Jonkie” Ouano uban sa pipila ka miyembro sa City Council ug sa Traffic Enforcement Agency of Mandaue (TEAM), sa bag-ong electric buses nga gipalit sa siyudad.

Ang mga bus adunay pasilidad alang sa persons with disabilities (PWDs) ug adunay electronic ramps ug aron masiguro ang kaluwasan sa mga pasahero aduna usab kini real-time monitoring cameras.

Matud ni Ouano nga nipalit ang siyudad og upat ka electric buses nga adunay kapasidad nga 30 ka pasahero matag biyahe.

Nasayran nga ang matag bus gikinahanglang i-charge sulod sa 12 ka oras.

Duha ka bus ang niabot kagahapon samtang ang laing duha gilauman nga moabot karong semanaha.

Ang siyudad mag-abang sa matag bus og P6,000 kada adlaw.  Matud usab ni Ouano nga nagtagana ang siyudad og P40 milyones alang sa abangan ug gibana-bana nga mokabat ngadto sa P15 milyones kada tuig ang kinatibuk-ang gasto sa abang.

Lakip na usab sa P6,000 ang sweldo sa driver, operational expenses, maintenance ug charging nga dumalaon sa Global Electric Transport Philippines (GET-PH), provider sa electric vehicle units.

Gipadayag ni Ouano nga mas pabor alang sa siyudad ang pag-abang kompara nga mopalit sa mga bus.

Ang dugang nga mga bus paagi sa siyudad sa pagtabang sa mga commuter ilabi na sa mga estudyante.

Ang upat ka electric buses moagi sa mga rota nga naglangkub sa mga barangay sa Paknaan, Centro, Cabancalan ug Canduman.

Kini nga mga lugar giila sa TEAM nga adunay pinakadaghang commuters.

Gipasabot ni Ouano nga dili tumong sa maong lakang nga makigkompetensiya sa transport sector apan aron makahatag og dugang nga kapilian sa commuting public ilabi na panahon sa rush hour.

Ang electric buses gikatakdang mobiyahe gikan alas 5:30 sa buntag hangtud sa alas 9:00 sa buntag, alas 11:00 sa buntag hangtud sa alas 12:30 sa udto ug alas 3:00 sa hapon hangtud sa alas 8:00 sa gabii. BDB BANAT NEWS