CEBU - Lima ka kawani lakip na niini ang tulo ka department heads sa dakbayan sa Talisay ang gikiha ngadto sa Visayas Ombudsman tungod sa kasong overpricing sa gipamalit nga mga ekipo ug uniporme alang sa mga sakop sa Talisay Rescue Emergency Assistance Team (TREAT).
Ang gikiha mao sila si Iriza Aquino, Administration Assistance II sa City Social Welfare, FO1 Guillermo Pegarido, Joan Vebar, hepe sa General Services Office (GSO), Edgardo Mabunay, City Budget Officer ug Viluzminda Villarante, City Accountant .
Ang misang-at og kiha kanila ngadto sa Ombudsman niadtong Decembre 2, 2008 mao si Rogelio Villaver sa Civil Security Unit (CSU) sa dakbayan.
Si Villaver kinsa sakop usab sa TREAT adunay nahuptang mga ebidensya bahin sa overpricing nga duha ka mga vouchers para sa tindahang Ma. Leigh Trading and Construction.
Gibutyag ni Villaver sa Banat News nga ang unang voucher maoy alang sa igbabayad sa uniporme sa TREAT samtang ang ikaduhang voucher maoy para sa mga equipment sa TREAT.
Matud pa ni Villaver nga nahibulong kaayo siya kay ang mga uniporme sa TREAT naggikan sa ALPHA Source ug ang ekipo gikan usab sa HABAGAT ug dili gikan sa “Ma. Leigh.”
Ang maong reklamo giduso ni Villaver sa sayo pa ngadto kang Konsehal Shirley Belleza kinsa mihandos niini sa kauban niyang konsehal nga si Sabeniano Abatayo aron imbistigahon apan wala kuno hatagi og pagtagad ni Abatayo.
Si Villaver kinsa gibatig kalagot sa kawalay lihok sa mga konsehal, siya na mismo ang mipadangtat niini ngadto kang Bise Mayor Lani Abarquez.
Kagahapon si Abarquez sa iyang gipahigayong privilege speech mipadayag sa iyang kasagmuyo ug kaulaw sa maong hitabo.
Nasuta nga sa transaksiyon sa TREAT, ang Tactical berets may presyo nga P3,600 apan matud pa ni Abarquez nga P8,485 ang gibayran sa syudad niini ug mikabat sa P4,885 ang overprice, ang Black Hawk belt P1,850 ang original nga presyo, apan ang gibayran sa siyudad P3,230, busa may overprice nga P1,380.
Ang Tactical Touch Duty Uniform may presyo nga P2, 500 apan gipa-overpraysan kini og P1,485.
Gawas niini gibutyag usab ni Abarquez nga niadtong milingkod siya isip acting city mayor naaprobahan niya ang P37 mil para sa usa ka airconditioning unit apan dihang iyang gipasusi nasayran niya nga ang presyo diay sa maong unit P25 mil ra.
Ang Magic Flakes nga tag P60 ang putos, gihimo kining P105, samtang ang Nescafe nga tag P142.60, gihimong P255.
Tungod niini si Abarquez miawhag kang Mayor Socrates Fernandez nga dili magpataka og pirma sa mga vouchers aron nga dili mahiadto sa dautang mga kamot ang kuwarta sa siyudad.
Ang buhatan sa Commission on Audit ug ang hepe sa kapolisan sa dakbayan gihagit ni Abarquez nga magpakabana niini ug ilhon ang mga tawo sa iyang palibot. – BANAT NEWS