CEBU - Sakmiton sa Bureau of Fire Protection (BFP) sa dakbayan sa Mandaue ang mga baligyang Christmas light nga walay certification gikan sa Department of Trade and Industry (DTI) tungod kay maisip kining substandard ug kuwestionable ang kalidad niini.
Kini ang nasayran sa Banat News kang SFO4 Isidro Aguilar sa BFP sa dakbayan sa Mandaue kinsa nagkanayon nga padayon nila karong gisuhid ang nagkadaiyang mga tindahan sa dakbayan aron sa pagsusi sa mga baligyang Christmas light.
Gipasabot ni Aguilar nga mahimutang sa kakuyaw ug peligro ang mga molupyo nga nanaod og dayandayan sa Pasko ilabi na sa Christmas light nga walay siguro ang kalidad.
Kini tungod kay mao kini kasagarang mahimong sinugdanan sa mga sunog nga makaangin sa mga silingan sa masunogan.
Dugang pa ni Aguilar nga sa dili pa nila sakmiton ang mga substandard nga mga Christmas light ila unang warningan ang mga tag-iya sa tindahan.
Apan sa pagbalik nila kun wala gihapon kini ikapresentar nga sertipikasyon gikan sa DTI dili na sila magpanuko sa pagsakmit niini.
Gawas niini ang publiko higpit gyung gipahimangnoan nila nga sa dili gyud pagpalit ug paggamit nianang mga substandard nga Christmas light aron sa paglikay sa aksidente sa sunog. – BANAT NEWS