Tulisang de motor natiklo

CEBU - Usa ka suspetsadong tulisan nga de motor ang nasakmitan og mga armas, mga bala, granada, weg nga buhok ug mga yawe dihang nasikop kini sa kapolisan didto sa barangay Tayud, lungsod sa Liloan sa miaging

adlaw.

Ang dinakpan mao   si Edmund Macaraeg Punay, 25, ulitawo, nga lumad nga taga Tabok, dakbayan sa Mandaue.

Ang nasakmit nga armas gikan sa maong suspetsado mao ang duha ka .38 kalibre nga revolver, mga bala niini , ug usa ka granada.

Si SPO1 Denis Malinao sa Liloan Police Station mibutyag sa Banat News nga si Punay mihingalan sa usa ka Christian Ceniza nga taga Paknaan, Mandaue City nga iyang kauban sa pagpanulis nga magsakay og motorsiklo.

Matud pa ni SPO1 Malinao nga ang weg sumala kang Punay maoy iyang isul-ob sa panahong manulis siya aron dili hiilhan ang iyang dagway sa biktima o kaha sa mga makasaksi.

Si SPO1 Malinao miingon nga ang pongpong sa mga yawe nga gitangkil ni Punay mao usay gamiton sa maong tulisan sa higayong modagit sila og mga motorsiklo aron himoong gate away vehicle inigsibat nila human makatulis.

Ang dinakpan mao usab ang suspetsado sa pag-carnap sa usa ka big bike niadtong Oktobre 14 niining tuiga didto sa Liloan ug napalgan kini nga gibiyaan didto sa barangay Suba-Basbas sa dakbayan sa Lapulapu nga wala nay gasolina.

Ang dinakpan nga gitanggong karon sa sulod sa detention cell sa kapolisan sa Liloan gitakdang pasakaan na og kaso sa kapolisan nga pagpanulis, pagpanglabni ug pagpangdagit og motorsiklo. – BANAT NEWS