CEBU - Ang mga nagpuyo sa yuta sa pamilyang Abapo sa sitio Sawsawan, barangay Tangke, Talisay mibahad kagahapon nga babagan nila ang mokoral niini.
Si Renato Borces, 36, usa sa mga nagpuyo sa maong lote ug nangangkon nga usa sa mga eridero niini nagkanayon nga andam niyang ibuhis ang iyang kinabuhi aron batokan si kinsa mang tawo nga mopasipala og koral sa yuta nga ilang gipuy-an karon.
Ang maong lote nga dunay gilapdon nga sobra sa 5,000 metro kwadrados gipuy-an karon sa 50 ka pamilya.
Gisuwayan kini og pakoral ni Julius Inocencio, ang miangkon nga usa sa mga tag-iya sa maong yuta sa miaging semana, apan gibabagan kini ni Borces busa wala molampos si Inocencio.
Matud ni Borces nga si Inocencio wala kapakita og mga dokumento nga siya'y tag-iya sa maong yuta busa ang mga nagpuyo niini dili motahod kaniya, matud pa ni Borces.
Si Borces miangkon gyud nga iyang mga apohan ang pamilyang Abapo nga maoy tag-iya sa maong yuta busa siya maoy may dakong katungod sa pagpanag-iya niini ug kutob sa mosuway sa pag-ilog sa maong luna andam niyang babagan ug isugal ang iyang kinabuhi. (BANAT NEWS)