Kaso sa kawat ug tulis sa Talisay, misaka

CEBU - Mikabat ngadto sa 36 ang mga nahitabong insidente sa tulis ug kawat sa dakbayan sa Talisay sulod lang sa bulan sa Nobiyembre niining tuiga.

Base sa talaan sa kapolisan sa siyudad unom sa maong insidente mao ang tulis diin ang 30 naglangkub sa kawat sa mga kable, metro sa tubig, lungkab ug mga kawat kinsa ang mga suspetsado mga katabang.

Si Senior Inspector Jovito Canlapan sa Talisay City Police Station sa pakighinabi niini sa Banat News nagkanayon nga dili kapugngan ang pagsaka sa kaso sa kawat ilabi na karon nga lisod ang panginabuhian apan dunay mga tawo nga dili gustong maghago ug gusto niini ang makabaton og dali nga kwarta hinungdan nga mosangpot sila sa pagbuhat og krimen.

Matud usab niini nga kasagaran usab nga motaas ang mga insidente sa kawat ug tulis kung umaabot na ang holiday season tungod kay nabatasan naman sa atong kultura nga adunay ilad-lad nga pagkaon diha sa lamesa aron saw-an panahon sa Noche Buena ug Media Noche.

Ang kasagrang kaso sa kawat ug tulis ang napasaka na sa kapolisan ngadto sa korte apan adunay uban ang wala mapasaka tungod kay ang mga biktima ang dili interesado nga mokiha batok ngadto sa suspetsado.

Sa laing bahin, nasuta sa talaan sa kapolisan nga mikunhod ang insidente sa tulis diha sa kadalanan kini tungod sa kanunay'ng pagpahigayon og check point sa kapolisan diha sa kadalanan sa siyudad.

Kahinumduman nga ubay-ubay na nga mga motorsiklo nga walay mga dokumento ang nasakmit sa mga polis atol sa ilang pag-check point.

Ang mga motorsiklo ang kasagaran maoy gamiton sa mga kriminal kung magbuhat sila og krimen.

Kahinumduman usab nga atol sa mga gipahigayong check points sa kapolisan sa siyudad aduna usab silay nasikop nga mga tawo nga kadudahan ang mga lihok ug uban kanila ang nasakmitan og mga armas ug napasakaan na usab kini og kaso ngadto sa korte. – BANAT NEWS