Opisyal sa Comelec managlahi og opinion

CEBU - Managlahi karon ang opinyon sa duha ka Comelec official sa Sugbu labot sa sugyot sa pipila ka konsehal sa siyudad pagbutang og registration satellite office diha sa mga mall.

Matud ni provincial election supervisor Attorney Lionel Marco Castillano nga dili mahimo ang gisugyot sa mga konsehal tungod kay ang mall usa ka private entity.

Ang election supervisor nga gitudlo usab kaniadto nga legal officer sa Comelec-7 mitataw nga ang satellite office mahimo lang ibutang sa usa ka publikong lugar.

Partikular na niini diha sa nagkadaiyang mga public school sa tibuok nasud, o diha ba hinuon sa tagsa-tagsa ka barangay hall.

Kini gibase ni Castillano sa section 4 sa Comelec Resolution 8514 nga maoy nagtakda sa pagpahigayon sa continuing registration.

Apan una nang gipadayag ni City Election Officer Attorney Marchel Sarno nga siya dili supak sa sugyot sa mga konsehal sa dakbayan.

Kini tungod kay ang mga mall giisip usab ni Sarno nga usa ka publikong lugar tungod kay libre ang tanan nga makasulod niini. Gani miingon ang election officer nga siya andam morikomindar ngadto sa ilang rehiyonal nga buhatan kung makadawat og hangyo gikan sa City Hall.

Mas gipaboran hinuon ni Comelec-7 Director Attorney Ray Rene Boac ang opinyon ni Sarno kay sa iya kanhing legal officer nga si Castillano.

Sumala ni Boac nga maisip usab nga public place ang mga mall tungod kay mahimong makasulod niini ang tanang tawo.

Sila si Konsehal Joey Daluz ug Gerry Carillo maoy nisugyot nga pabutangan og registration satellite office o registration booth ang pipila ka mall sa siyudad.

Kini aron mahatagan og kasayon sa pagparehistro kadtong mga botante sa dakbayan nga manuroy sa mga mall matag Sabado ug Domingo.

Ang continuing registration gitakdang magsugod na karong umaabot nga Lunes ug kini tapuson unya sa Disyembre 15 sunod tuig. – BANAT NEWS