Fleet Marine exercise himuon sa Navforcen diha sa lungsod sa Argao

CEBU - Molusad og lima ka adlaw nga fleet – marine training exercise ang Naval Forces Central ug sa Philippine Marine Corps sa Cebu karong umaabot nga Disyembre 2 ngadto na sa Disyembre 6.

Kini aron masusi ang kaandam sa Philippine Marines ug Philippine Navy sa ilang operasyon sa konseptong Fleet-Marine panahon unya kung dunay hulga sa sulod man o gikan sa gawas sa nasud.

Ang maong exercise nga gibansagang “Exercise Pagsisikap 2008” mosentro sa kapabilidad sa maong units ug assets sa navy lakip na ang ilang mga support assets sa ilang kaandam sa mga special operations.

Di angayang ikatingala sa mga residente sa sitio Looc sa barangay Poblacion sa Argao ang usa ka amphibious raid exercise sa buntag nga langkuban sa nagkalain-laing assets sa navy.

Kini maglangkob sa Fleet-Marine Planning Staff; Field Training Exercise; ug Community Relations.

Tulo ka mga barkong iggugubat sa Philippine Navy ang mosalmot sa maong exercise ug kini mao ang BRP Dagupan City nga usa ka landing ship tank; ang duha ka gunboats nga BRP Beinvenido Salting ug BRP Abraham Campo.

Lakip sa gamitong assets mao ang usa ka UH1H Huey gikan sa Philippine Air Force; special operations platoon sa Marine Battalion Landing Team; Special Naval Operations ug ang Navy Islander Plane.

Ang exercise director mao si Captain Honorio Balanon Jr. ang kasamtangang Navforcen commander.

Gipaabot nga atol sa pagbukas sa exercise tambungan kini ni Major Gen. Ben Dolorfino, ang commandant sa Philippine Marine Corps isip guest of honor ug ang Philippine Fleet commander nga si Rear Admiral Geronimo Defensor maoy mo-preside sa pagtak-op sa exercise. - BANAT NEWS