Duha patay 142 nalandig sa tambalanan sa kalibanga

CEBU - Duha ka tawo ang namatay ug 142 ka tawo sa tulo ka mga lungsod sa Negros Oriental ang nalandig sa tambalanan human makasinati og kalibanga nga gituohang gumikan kini sa kontaminadong tubig nga ilang nainom.

Ang mga municipal health official ang mikompirmar nga ang kontaminadong tubig nga ilang nainom maoy nakaingon sa pagtakboy sa maong matang sa balatian sa mga lumolupyo sa lungsod sa Tayasan, Ayungon ug Taysan sa nahisgotang lalawigan.

Sa mokabat 144 ka mga pasiyente ang 68 niini gikan sa lungsod sa Bindoy, 61 sa lungsod sa Ayungon ug 15 usab ang gikan sa lungsod sa Tayasan.

Sa taho sa Department of Health (DOH) sa maong lalawigan maoy nasayran nga niadtong Oktobre 1 niining tuiga ang unang natala nga pagtumaw sa maong matang sa balatian.

Si Dr. Socrates Villamor sa DOH sa maong lalawigan miingon nga ang water sampling ang ilang gipahigayon alang sa pagsuta sa gigikinanan sa maong tubig nga kontaminado nga nainom sa mga lumolupyo sa maong mga lungsod.

Dugang pa niya nga ang Regional Epidemiologist and Surveillance Unit sa Region 7 ang padayon na karon nga nagkuha og sample sa tubig sa maong mga lungsod nga pagadad-on sa rehiyonal nilang buhatan sa dakbayan sa Sugbo alang sa laboratory test nga pagahimoon niini. - Romeo T. Limpangog (BANAT NEWS)