CEBU - Nabanhaw ang tinguha ni ABC president Eugenio Faelnar nga padad-on og armas ang mga barangay tanod human sa nahitabong pagpapusil sa tanod sa Lorega-San Miguel atol sa checkpoint diha sa dalan Echavez ug Lorega.
Nasayran nga si Mariano Calbario niapil pagpahigayon og checkpoint sa kapulisan diha sa eskina sa dalan Echavez ug Lorega niadtong miaging semana.
Apan usa sa duha ka mga pasahero nga gituuhang tulisan ang dunay armas mipusil kang Calbario sa dughan atol sa ilang pagkanaug.
Matud ni Faelnar nga siya makadaghan na makadungog nga dunay mga tanod nga gipamusil, gipanunggab atol sa ilang duty.
“Kadaghan na ko nakadungog ug ingon niana nga kaso, dili hinoon garantiya nga dili na mapusilan ang tanod kung dunay armas pero makabawos tingali,” sumala ni Faelnar.
Giingong pabor si Mayor Tomas Osmeña pag-armas sa mga barangay tanod atol sa ilang duty apan di prayoridad sa dakbayan ang pagpalit og ilang armas.
Nagkanayon si Faelnar nga subli niyang isugyot ang pagpadala og armas sa mga barangay tanod atol unya sa general assembly sa ABC karong sunod buwan.
Matod ni Faelnar nga ang ABC andam nga mogasto sa pagpaubos unya og training sa mga tanod nga maoy padalhon og armas atol sa ilang duty. (BANAT NEWS)