60 batan-on sikop sa Talisay curfew

CEBU - Bisan pa sa padayong implementasyon sa kagamhanan sa dakbayan sa Talisay sa ordinansa sa curfew ngadto sa mga teenager aduna gihapoy daghang nangadakpan.

Niadtong Sabado sa gabii mikabat ngadto sa 60 ka mga batan-on ang mga nadakpan sa curfew apan kasagaran kanila ang dili mga residente sa siyudad.

Mabantayan nga kasagarang mga batan-on nga mga Talisaynon magdali na nga makauli sa ilang mga panimalay inig abot sa alas nuybe na sa gabii tungod sa maong curfew.

Apan duna gihapoy mga malingaw og hugoy-hugoy sa ilang mga higala hinungdan nga maabtan kini sa oras sa curfew ug maagian sa mga nag-roving nga mga polis ug tanod.

Kahinumduman nga ang curfew naimplementar na kini sa milabay'ng mga buwan apan nahunong ning bag-ohay lang usab nga gibalik sa pag-implementar tungod kay nasuta nga daghang mga batan-on ang nalambigit na sa mga krimen sa maong dakbayan.

Si Senior Inspector Jovito Canlapan, officer in charge sa Talisay City Police Station sa pakighinabi niini sa Banat News nagkanayon nga si Osmundo Manreal Jr. presidente sa Association of Barangay Captain (ABC) ang nagpasiugda nga mabalik ang implementasyon sa curfew.

Matud niini nga ang tanang mga kapitan sa kabarangayan sa siyudad ang aktibo sa maong kalihukan.

Ang kapolisan maoy mihatag og mga polis sa mga kapitan aron makadala og mga polis ngadto sa mga barangay nga uban sa pag-roving sa mga tanod.

Gibutyag ni Canlapan nga nasuta sa mga opisyal sa siyudad nga daghang mga batan-on ang mag-estambay diha sa kadalanan ug kasagaran kanila nalambigit sa mga krimen sama sa pagpangawat, hingos og rugby ug gang wars hinungdan nga gipahigpitan na karon ang implementasyon sa curfew.

Niadtong milabay'ng Sabado may kapin 30 ka mga batan-on ang gisikop sa Talisay. – BANAT NEWS