CH employees nangita sa allowance

CEBU - Naningil na ang mga empleyado sa Cebu City Hall sa ilang Additional Compensation Allowance (ACA) nga gisaad sa kagamhanan sa dakbayan human nila masayring dunay kapin sa P700 milyones nga surplus ang City government niining tuiga.

Ang P12 mil nga ACA gisaad sa siyudad ngadto sa mga kawani niadto pang tuig 2006 apan hangtud karon kini giingong wala pa ma-release.

Nanghinaut ang mga city hall employees nga mahatag na niining tuiga ang ilang ACA aron magamit sa Pasko.

“Ikalipay gyud namo na kung ilang mahuna-hunaan paghatag ang ACA kay dugay na to kaayo nilang gisaad,” sumala sa usa ka empleyado.

Gipasalig hinoon ni Konsehal Joey Daluz nga ang nahisgutang allowance mahatag ra ngadto sa mga kawani sa City Hall.

Ang konsehal nga maoy chairman sa Committee on Budget and Finance sa City Council niingon nga ang ACA ilang utang ngadto sa mga empleyado.

“Utang nato na sa mga tawo unya kulang pa man atong kwarta, pero sa sunod tuig kung mahalin na ang SRP mahatag gyud nato na nila,” sumala ni Daluz.

Gipasabot sa konsehal nga bisan kung dunay surplus ang dakbayan niining tuiga, apan duna pay daghang prayoridad ang siyudad.

Gipadayag hinoon ni Daluz nga ang 10 porsiyentong salary differential sa dul-an sa 5 mil ka mga kawani maoy ilang unahon sa paghatag sunod buwan.

Nagkanayon si Daluz nga ilang gitinguha nga dungan nga mahatag ang tulo ka buwan sa miaging tuig ug ang unom ka buwan niining tuiga nga salary differential.

Sa nasayran, dili pa lang dugay nga gi-release sa City government ang yearend bonus ingon man ang cash gift sa mga empleyado.

Gani kini nahimo pang kontrobersyal human masayri sa personnel department nga kini mas sayo nga gihatag kay sa nalatid sa budget circular number 65. - BANAT NEWS