2 sikop sa checkpoint

CEBU - Nagtingkagol sa Talisay City detention cell ang duha ka lalaking nasakmitan og pusil ug kutsilyo diha sa usa ka checkpoint niadtong Huwebes sa gabii diha sa dakbayan sa Talisay.

Ang mga nasikop mao sila si Ernie Labusan, 40, taga barangay Cansojong sa maong siyudad ug Mario Tulo, 40, taga sitio Salvador, barangay Tanke.

Nasakmit gikan kang Labusan ang usa ka kalibre .38 nga rebolber nga dunay tulo ka buhing bala samtang si Tulo nasakmitan og kutsilyong siyam ug tunga ka pulgadas ang gitas-on atol sa checkpoint sa barangay Tanke.

Si Senior Inspector Jovito Canlapan, officer in charge sa Talisay City Police Station sa pakighinabi niini sa Banat News kagahapon sa buntag nagkanayon nga ubay-ubay sad nga motorsiklong walay mga dokumento ang ilang na-impound ug sobra na usab sa napulo ka tawo ang ilang mga nasikop nga nagdala og mga armas atol sa ilang mga check point nga gipahigayon.

Gibutyag ni Canlapan nga kabahin kini sa gimugnang “Task Force Motorsiklo” aron mamentenar ang kahapsay ug kalinaw sa Talisay.

Ang Task Force Motorsiklo sa Talisay ang natukod niadtong buwan sa Septiyembre niining tuiga.

Niadtong buwan sa Oktobre niining tuiga ang kagamhanan sa dakbayan ang mihatag og upat ka motorsiklo nga magamit usab sa kalihokan sa task force ug gihangop kini ni Canlapan.

Ang mga sakop sa TCIB gilangkuban og mga anti-crime volunteers ug mga tanod. – BANAT NEWS