CEBU - Ilusad na ugmang adlawa ang “Oplan Linis-Sugbu” pinaagi usab sa dungan nga pagpanglimpyo sa pipila ka sector nga anha himuon sa sitio Viking diha sa barangay Mambaling sa siyudad sa Sugbu.
Ang Oplan Linis-Sugbu maoy kalihukan nga tambayayo ngan sa Armed Forces of the Philippines (AFP) ug sa kagamhanan sa dakbayan ug ang tumong mao ang pagpreserbar ang kanindot sa kalikupan ingon man sa palibot nga gihulga sa nagkadaiyang matang sa polusyon.
Gawas niini gitinguha usab sa mga organizer nga madasig sa pagpanglimpyo ang mga molupyo sa usa ka barangay nga ilang duawon.
Labing minos 150 ka AFP personnel gikan sa Central Command ang mosalmot sa kalihukan gawas sa 100 ka ROTC cadets.
Wala pay labot niini ang mga molupyo sa barangay Mambaling nga gipaabot usab nga moduyog sa dungan nga pagpanglimpyo.
Nasayran nga ang Oplan Linis-Sugbu himoon na sa mga organizer matag katapusang Sabado sa buwan sa nagkadaiyang barangay sa siyudad. – BANAT NEWS