Demand letter para sa zoo gisalikway

CEBU - Gisalikway sa kagamhanan sa dakbayan sa Sugbu ang demand letter sa provincial government labot sa pagbawi sa pito ka ektaryang luna nga nahimutangan sa Cebu City Zoo sa barangay Kalunasan.

Matud ni Cebu City Acting Mayor Hilario Davide III gibarugan sa siyudad ang posisyon, pag-operate ug pagmentinar sa nahisgutang zoo.

 “We will continue to possess, operate, ang maintain the zoo mao gyud na ang baruganan sa atong dakbayan ever since nga nitumaw nang maong issue,” sumala ni Davide kabahin sa unod sa ilang tubag sa maong suwat.

Sa pikas bahin, gikumpirmar ni Capitol Consultant Rory Jon Sepulveda, nga ila nang nadawat ang gipadangat nga suwat sa city government.

Ang gikahibulong sa consultant mao ang pag-insister sa kagamhanan sa dakbayan pag-okupar sa luna nga giingong walay igong kapasikaran.

Gipadayag ni Sepulveda, nga ila nang gipatun-an sa provincial attorney ang tubag sa city government, alang sa sunod nilang lakang nga pagahimuon.

Apan nitataw ang consultant nga kung walay laing paagi pagsulbad sa maong problema, mapugos ang Kapitolyo sa pagpadangat og reklamo ngadto sa hukmanan.

 “Kung managlahi ang among posisyon dili man pwede nga magpatas-anay mi sa ihi, ikiha gyud na sa korte, mao nay logical nga consequence,” matud ni Sepulveda.

Una nang gipadayag ni Mayor Tomas Osmeña nga dili yanong buhian sa dakbayan ang gibarugan sa zoo hangtud nga duna nay kamanduan ang hukmanan niini.

Apan malaumon hinuon si Sepulveda nga mapangitaan pa og laing solusyon ang pagbawi sa nahisgutang luna nga dili moagi sa korte. – BANAT NEWS