Komentarista gipusil patay

CEBU - Patay ang usa ka magsisibya nga komentarista sa radyo human pusila sa wala hiilhing mamumuno kagahapon sa buntag didto sa dakbayan sa Gingoog, Misamis Oriental.

Ang biktima giila nga si Aristeo Padrigao, komentarista sa DYRS Radio Natin Station nga nagbase sa dakbayan sa Gingoog.

Samtang ang mipusil kaniya, usa ka tawo nga nagsakay og motorsiklo nga nagsul-ob og   crush helmet. Wala pa matataw sa kapolisan kung kinsa ang kriminal ug ang motibo sa pagpatay kang Padrigao.

Si Senior Superintendent Catalino Rodriguez, provincial director sa kapolisan sa maong lalawigan miingon nga si Padrigao gikan pa nga naghatod sa iyang anak paingon sa tulunghaan dihang ang nagbinugtong nga mamumuno nga nagsakay og motorsiklo miluthang kaniya sa walay igong hinungdan.

 Gikondinar dayon sa National Union of Journalist of the Philippines ang pagpatay kang Padrigao.

 Si Padrigao maoy ikalimang journalist ang gipatay dinhi sa nasud sukad pa niadtong Enero niining tuiga.

Naglakip kanila mao sila si Benefredo Y. Arcabal sa Pilipino Newsmen sa Cavite-Bulacan, Marcos Mataro sa UNTV 37. Manila, Bert Sison sa DZAT AM sa Lucena City ug Dennis Cuesta sa RMN DXMD sa General Santos City.   (BANAT NEWS)