Gipusil tagak sa motor

CEBU - Kritikal ang kahimtang sa usa ka lalake human kini matagak sa gisakyang motorsiklo dihang gipusil kini didto sa barangay Pulpogan lungsod sa Consolacion sa milabay’ng kaadlawon.

Ang biktima mao si Albert Quinto, 18 , ulitawo, lumad nga taga lungsod sa Sibonga ug kasamtangang nagpuyo sa Phase-II barangay Pulpogan.

Si PO1 Winston Magdadaro sa Consolacion Police Station mibutyag sa Banat News nga ang biktima nag-angkas sa motorsiklo uban ang iyang mga barkada nga sila si Micheal dela Peña,19, ulitawo ug Reneboy Castillo, 43, ulitawo, nga pulos taga Pulpogan.

Nagpaingon sila nga mopauli sa ilang mga panimalay samtang nagsunod ang laing motor nga Yamaha kolor puwa nga maoy gisakyan sa wala hiilhing kriminal ug dihadiha gipusil ang biktima sa walay igong hinungdan.

Naigo sa tangkogo ang biktima ug natagak kini sa motorsiklo ug gibiyaan sa iyang mga kauban sa kahadlok nga mapusilan usab sila ug hinuon midiretso sila pagsumbong sa kapolisan. - Darrel A. Carumba ug Romeo Limpangog  (BANAT NEWS)