CEBU - Nagsukmagay ang duha ka mga tanod atol sa oras sa ilang duty sa barangay hall sa barangay Tulic lungsod sa Argao niadtong Miyerkules sa alas 8 sa gabii.
Ang nidangop ug nagpa-blotter sa kapulisan mao ang tanod nga si Cemporiano Chavez, 50, ug mipasangil nga kini nakulatahan sa kaubang tanod nga si Narciso Saquilon.
Matud ni PO1 Eva Caminade, desk officer sa Argao Police Station dihang nahinabi sa Banat News nagkanayon nga alas 8 sa gabii niadtong Miyerkules niabot sa barangay hall si Cemporiano ug ni-logbook kini timaan sa iyang pagsugod og duty.
Apan samtang nag-logbook giduol kini ni Saquilon nga duty sab niadtong higayuna ug walay daghang pasumangil gikwelyohan siya niini hinungdan nga nagsukmagay.
Giangkon ni Cemporiano nga gilupig siya ni Saquilon maong nakaangkon siya og daghang bun-og hinungdan sa iyang pagreklamo sa polis ug pagkahuman nagpatambal sa Isidro Kintanar Memorial hospital.
Wala masayod si Cemporiano kung unsay motibo ni Saquilon sa gihimo niini kaniya apan kini mibahad nga mopasaka gyud og kaso batok sa naulahi. - Darrel Carumba (BANAT NEWS)