3 ka tawo napusilan

CEBU - Tulo ka tawo ang naangol kay napusilan didto sa managlahing lugar sa Lapu-lapu City niadtong miaging gabii.

Sila mao si Salem Dungog, 49, minyo, ug Erwin Dungog, 27, ulitawo, nga pulos taga Sudtongan, barangay Basak, Lapulapu City, ug Rodulfo Bagal, hingkod, nga taga Gabi, Cordova.

Samtang ang suspetsadong mipusil kang Salem ug Erwin Dungog mao si Edwin Remulta, hingkod, nga may kaubang si Manuel Tampus, hingkod nga giingong maoy back up niini.

Ang nakapusil usab kang Bagal mao si Reynaldo Dy, hingkod nga taga sitio Carajay, barangay Gun-ob.

Si PO3 Elmer Canillo sa homicide section sa kapolisan sa maong dakbayan miingon nga si Salem Dungog ug ang iyang pag-umangkon nga si Erwin Dungog namisita sa panimalay ni Abundio Dungog sa sitio Caimitohan, barangay Canjulao, nga ilang paryente nga giingong maoy gikabangi sa suspetsado.

Matud pa ni PO3 Canillo nga nagtan-aw lang og telebisyon ang mga biktima dihang kalit lang mitumaw ang suspetsado ug namusil.

Human maigo ang mga biktima, misirit dayon ang mga suspetsado pahilayo luwan sa usa ka motorsiklo.

Sa gihimong follow -up operation sa kapolisan, nadakpan si Tampus apan si Remulta nakasibat.

Si Salem naigo sa paa samtang ang buko-buko maoy naigo sa iyang pag-umangkon nga si Erwin.

Samtang si Bagal may gikainom didto sa   Carajay dihang mitumaw ang suspetsado ug gipusil ang nahauna sa dughan.

Human masabak ang biktima, misibat usab dayon ang suspetsado pahilayo sa maong lugar.

Ang tulo gidala dayon ngadto sa Lapulapu District Hospital apan gumikan sa katalandugon sa ilang kahimtang gihatod sila ngadto sa Vicente Sotto Memorial Medical Center sa dakbayan sa Sugbu. – BANAT NEWS