CH workers dismayado sa SOCA ni Tom

CEBU - Gihulagway nga walay bag-o sa kapin sa 40 minutos nga State Of the City Address (SOCA) ni Mayor Tomas Osmeña kagahapong adlawa.

Pipila ka mga naniid nga nisaksi sa gipahigayong SOCA sa mayor nga nahinabi sa Banat News nipadayag nga ila nang nabati ang mao gihapong mensahe niini.

Gani dunay mga kawani mismo sa City Hall ang nadismaya tungod kay walay gipahibalo ang mayor nga alang usab kanila.

Una nang nikatap ang taho nga ipahibawo ni Osmeña sa iyang SOCA ang Additional Compensation Allowance ingon man ang dugang suhulan sa mga kawani.

Hinuon, labihang nakapakpak ang mga senior citizens sa siyudad nga nitambong usab sa SOCA tungod sa subling gipahibawo sa mayor ang pagtuman niini sa campaign promise niadtong miaging tuig, sa higayon nga mahalin na ang South Road Properties (SRP).

Ang mayor nisaad kanila paghatag og tag-usa ka libo ka pesos matag birthday ug laing usa ka libo ka pesos matag Disyembre isip pinaskuhan.

Gipaniguro sa mayor nga mokita na ang dakbayan sa SRP sunod tuig tungod kay duna nay pipila ka mga investor nga interesadong mopalit og luna niini.

 Lakip sa gipasigarbo sa mayor sa iyang SOCA mao ang giingong total performance sa dakbayan ubos sa iyang administrasyon.

Matud ni Osmeña nga nahimong numero uno ang siyudad sa natad sa garbage collection, traffic, children’s program ingon man sa investment promotion ug uban pa.

Dugang nga gipasigarbo sa mayor mao ang iyang gimugna nga Mayor’s Management Team (MMT) nga giingong dako og natabang sa iyang pamunuan.

Labaw sa tanan, ang mga konsehal sa dakbayan nga gihulagway sa mayor nga aktibong nihimo sa ilang tagsa-tagsa ka mga gimbuhaton.

Makapahinuklog hinoon sa mga Sugbuanon ang katapusang mga pulong nga giluwatan sa mayor atol sa iyang SOCA.

“I don’t know what the future is in store for me but let me tell you, no one can take away the great privilege of having serve you, I’m very proud of that, and I don’t know what pain or suffering I might have to endure, but this I will tell you, I will dedicate all my pain and sufferings to my wife, to my son, to my friends, and to all of you my brother Cebuanos,” matud pa sa mayor.

Sa iyang bahin mapasalamaton usab ang unang ginang sa siyudad nga si Margot tungod sa suporta ug pag-ampo nga gipakita sa mga Sugbuanon ngadto sa iyang bana alang sa daling pagkaayo niini sa balatian.

Ang unang pamilya sa dakbayan gitakda nang mobalik sa Estados Unidos karong adlawa alang sa pagpaubos na og chemotherapy sa mayor.

 Si Osmeña na-diagnose nga dunay cancer sa iyang pantog ug kini ipaubos una sa chemotherapy sa dili pa tangtangon ang urinary bladder niini. – BANAT NEWS