Submersible pump nga gihatag ni Gwen sa brgy. Obo gikawat

CEBU - Gikawat sa wala mailhing tawo ang submersible water pump nga gihatag ni Gobernador Gwendolyn Garcia sa barangay Obo lungsod sa Dalaguete.

Ang kapitan sa maong barangay nga si Tarcela Barral tuyong nibisita kagahapon sa buhatan sa Banat News nga nagdala og kopya sa blotter sa Dalaguete Police Station ug sertipikasyon nga nagpamatuod nga nawagtang ang ilang water pump ug gituuhang gikawat sa wala mailhing tawo nga nikantidad sa gibana-banang P90 mil sa pamasin nga mabasahan sa nakapalit sa water pump.

Niadtong Oktobre 25 sa gabii si Kagawad Dionesio Besin miyembro sa Committee on Water Works sa ilang barangay nisaysay ngadto ni PO3 Cristopher Requina nga dihang iyang gibisita ang water system connection (kabahin sa iyang trabaho) wala na diha ang ilang water pump.

Gikatahong putol na ang wire nga nagdugtong sa power house ug sa submersible water pump, ang maong bomba gibana-banang 25 ngadto sa 30 kilos ug wala na diha.

Gikatahong gibuak og tuyo sa mga kawatan ang kongkretong tangke nga gimuntaran niini.

Ang maong pump may markang “Grundfos” Submersible Pump nga may stainless bowls ug impellers lakip na ang Franklin Submersible motor niini. Kauban usab niini ang check valve nga model SP 3A-34, 3.0hp ug uban pang piyesa niini.

Matud pa ni kapitan Barral, sa dihang nahinabi sa Banat News nanawagan sa si bisan kinsang nakapalit niini sa pag-uli niini kanila ug aron usab ipahibalo sa gobernador nga naninguha silang mabalik kini kanila.

Gibutyag ni Barral, gibanabanang mosubra na sa P2 milyones na ang nahatag ni Garcia sa ilang barangay ug andam siya modawat sa bisan unsang kasaba gikan sa gobernador tungod niini.

Ang maong pump maoy nagsuplay og limpyong tubig sa ilang barangay ug tungod sa pagkawat sa pump hayan mameligro na usab ang ilang panglawas ilabi na sa kabataan. – BANAT NEWS