CEBU - Gihimakak sa usa ka magtutudlo sa Talisay City National High School ang mga pasangil batok kaniya nga iyang gibuwad sa init ang iyang mga estudyante tungod sa pagkapakyas niini og dala og botelya sa usa ka supplemental drink nga maoy himoon nilang Christmas Tree aron makaapil sila sa contest.
Si Sweetheart Tayong adviser sa first year-section “Gaea” ug dunay 76 ka mga estudyante sa pakighinabi niini sa mga tigbalita kagahapon sa buntag nagkanayon nga iyang gipalinya ang iyang mga estudyante atol sa flag ceremony niadtong Lunes sa alas 7:30 sa buntag.
Apan human sa flag ceremony nagsige gihapon og pabuyag ang iyang mga estudyante hinungdan nga iyaha kining gimanduan nga pabalikon sa ilang linya ug kung andam na kining mamati kaniya pwede na kining mosulod sa ilang classroom aron magsugod na sila sa klase.
Apan ang uban wala gyud maminaw ug hinuon nagdagan-dagan kini.
Hinungdan nga miduol na siya sa ilang guidance counselor nga si Royjean Cerilla aron makapangayo og ayuda sa pagbadlong o pagmaymay sa iyang mga estudyante.
Gibutyag ni Tayong nga gitambagan unta siya sa iyang doktor nga mopahuway una sa iyang trabaho tungod sa iyang pagkonsimisyon sa kabadlungon sa iyang mga estudyante ug gani pirme lang kakuhaan sa iyang gisabak.
Si Tayong unang nakuhaan sa iyang gisabak niadtong Hunyo ug misunod niadtong Septiyembre niining tuiga apan matud niya nga tungod sa iyang pagbati ngadto sa iyang mga tinun-an mibalik siya og report sa trabaho bisan og dili pa unta angayan.
Matud usab niya nga ang pagpadala niya og botelya dili pinugsanay apan gihimo kini niya nga usa sa mga proyekto sa mga bata tungod kay kung ang mga bata nga makadala og mga botelya hatagan man niya og puntos sa grado niini ilabi na niadtong makadala og napulo ka botelya pataas.
Tanang mga tinun-an gikan sa first year ngadto sa fourth year ang gisangonan nga padalhon og botelya sa supplemental drink tungod kay gusto silang moapil sa contest nga gipasiugdahan nga dunay premyo gikan sa P3,000-P7,000 sa major prizes ug P1,000 sa consolation prize sa mga kompaniya sa maong mga ilimnon.
Unya misaad si Tayong nga kung madayon sila og apil sa maong contest unya modaog og kwarta mahimong gamiton nila kini sa Christmas party sa iyang mga estudyante. – BANAT NEWS