CEBU - Mikabat sa P60,000 kapin kon kulang ang kantidad sa cash ug mga alahas nga nasakiyo sa mga tulisan gikan sa usa ka estudyante sa caregiver school nga natulis didto sa dalan A.C. Cortes Avenue sa barangay Alang-Alang, dakbayan sa Mandaue ala 1:00 pasado ang takna sa hapon niadtong miaging adlaw.
Si SPO1 Arnulfo Quiatson sa theft and robbery section sa Mandaue City Police Office (MCPO) miila sa biktima nga mao si Retlisa Endrado Bibo, 31, minyo, nga taga barangay Lawaan, sa dakbayan sa Danao.
Matud pa ni SPO1 Quiatson nga gikan nga naniudto sa usa ka pocherohan sa Alang-alang ang biktima dihang naglakaw kini paingon sa eskuylahan sa caregiver sa maong lugar aron motambong sa ilang graduation sa maong adlaw.
Apan matud pa ni SPO1 Quiatson nga ang biktima gisundan sa tulo ka batan-ong lalake nga pulos armado ug dihadiha gitionan dayon kini sa ilang armas de fuego dungan sa pagpangayo sa iyang mga alahas ug salapi nga nagkantidad og P29, 000.
Dugang pa ni SPO1 Quiatson nga lakip sa nakuha sa mga tulisan gikan sa biktima mao ang wedding ring nga bulawan, ariyos nga bulawan, kuwentas nga bulawan ug cellphone nga nagkantidad og P33,000.
Si Quiatson miingon nga human makuha ang salapi ug mga alahas sa biktima ang tulo ka tulisan didto mopaingon sa daghang kabalayan sa maong lugar ug dali kaayong nahanaw. – BANAT NEWS