Gidunggab angol sa diskohan

CEBU - Nalandig sa tambalanan ang usa ka 18-anyos nga lalake human kini dunggaba sa wala hiilhing kriminal nga miparegla kaniya atol sa gipahigayong Halloween disco didto sa barangay Cansojong, dakbayan sa Talisay kagahapon sa kaadlawon.

Ang biktima giila sa mga polis nga si Adibaran Sabalde, taga Victoria Village, barangay San Isidro, Talisay City kinsa nakaangkon og mga samad dinunggaban sa iyang buko-buko.

 Base sa imbestigasyon sa mga sakop sa homicide section nasayran nga si Sabalde mikuyog sa iyang mga higala nga nanayaw sa disko.

Apan didto sulod sa diskohan, giingong may mga grupo sa mga batan-on nga nagpunay og tutok kang Sabalde ug sa walay igong rason miatake kini ngadto sa biktima.

Usa sa kauban sa maong grupo milanit og kutsilyo ug dihadiha gihansakan ang buko-buko sa biktima.

Human matusak ang bukobuko sa biktima naglumba og panagan ang namaregla kaniya pahilayo sa maong lugar.

Si Senior Inspector Jovito Canlapan, officer in charge sa Talisay City Police Station mibutyag sa Banat News kagahapon sa buntag nga posibleng gikasuyaan lang ang biktima hinungdan nga gipareglahan kini og dunggab.

Nasayran usab nga gumikan sa maong hitabo sa kasamok gipaundang ang maong disko. – BANAT NEWS