CEBU - Plantsado na ang kalihukan sa Oplan Kalag-Kalag sa kagamhanan sa dakbayan sa Sugbu ugmang adlawa ug sa adlaw sa mga kalag karong Domingo.
Sa gipatawag nga tigum ni acting mayor Michael Rama gitambungan kini sa tanang stakeholders sama sa kapulisan, barangay officials, Parish Security Group, United Security Group, ug uban pa.
Sama sa gipaabot, ang acting mayor subling mipahinumdom sa angayang buhaton sa mga sakop sa gihulmang Oplan atol sa kalag-kalag.
“My specific instructions to them nga balikan nila ang debriefing nga kopya kay aron kakorihian tong weakness nila,” sumala ni Rama.
“I also told them nga hatagan og emphasis ang mga ordinansa kay walay balaud nga gi-suspend niining higayuna ug ipatuman ang maximum tolerance,” matud sa acting mayor.
Buot masiguro ni Rama nga mamentinar ang kahapsay ug kalinaw sa dakbayan ilabi na diha sa mga sam-ang atol sa kalag-kalag.
Kini aron dili mabulabog ang mga tawo nga moduaw sa ilang mga mahal sa kinabuhi nga nitaliwan na ngadto sa laing kalibutan.
Ang dakbayan dunay onse ka public ug private cemetery nga gipaabot nga punsisukan sa bagang duot sa katawhan sugod ugmang adlawa.
Kini mao ang Pardo, Labangon, Calamba, Talamban, Cempark, Lorega, Carreta, Doña Pepang, Chinese, Ludo ug Queen City Gardens.
Lakip sa gipahimangnoan ni Rama mao ang mga tinugyanan sa City Traffic Operations and Management (Citom) nga andamon ang tanang mga traffic signs.
Tumong sa acting mayor niini nga mahatagan og giya ang mga motorista ug ubang road users subay usab sa ipatuman nga traffic rerouting. – BANAT NEWS