CEBU - Gisaka sa ilang balay ug pagkahuman gipusil sa makadaghang higayon samtang natulog tupad sa iyang asawa ug anak ang 29 anyos nga lalaki didto sa Sitio Camansilis, barangay Talavera siyudad sa Toledo kagahapon sa alas 3 sa kaadlawon.
Ang biktima nga wala na makamata pa og mideretso og kamatay human maigo sa ibabaw'ng bahin sa walang bahin sa iyang tiyan mao si Jose Canoy Murao, 29, ulitawo, molupyo sa nahisgutang lugar ug walay klarong trabaho.
Samtang wala pa mailhi sa kapolisan ang nagbinugtong nga lalaki nga maoy misaka sa balay gamit ang wala pa matino nga kalibre sa armas dayong pusil sa biktima.
Matud ni PO1 Florante Cayson sa Toledo City Police Station sa dihang nahinabi sa Banat News nga nahinanuk sa pagkatulog ang biktima tupad sa iyang pangasaw-onon nga si Wenda Sumcalang ug usa niini ka 3 anyos nga anak.
Nabati na lang sa mga silingan ang tulo ka sunod-sunod nga buto sa armas nianang pagka-kadlawon ug paghimata sa asawa niini mao na lay iyang nakit-an nga nagkadugo na ang iyang bana nga diha sa iyang tupad ug gisuwayan unta niya kini sa pagpukaw apan wala na momata pa hinungdan nga nangayo dayon kini og panabang sa mga silingan.
Sa pag-responde sa mga polis patay na ang biktima samtang nakasibat na pahilayo sa lugar ang nagbinugtong nga suspek.Sa paghimo ning balita wala pa makuhai og pamahayag ang asawa sa biktima tungod kay anaa pa kini sa state of shock. (BANAT NEWS)