Nahagbong sa pangpang patay

Nagtugway sa kanding gikatahong nahagbong sa usa ka gatos ka tiil nga pangpang hinungdan sa iyang kamatayon apan nakit-an mga alas 6 sa buntag kagahapon diha sa Sitio Sto. Niño barangay Apas ning dakbayan.

Ang namatay giila sa kapolisan nga si Porferio Papillero, 59, minyo, taga Sitio Lower sa nahisgutang lugar nakit-an na lang sa iyang anak nga nagkulob nga wala nay kinabuhi.

Base sa imbestigasyon nila ni SPO4 Alex Dacua ug mga kaubanan sa Homicide Section sa Cebu City Police Office nga ang anak sa biktima nga si Joseph mao nay mipahibalo sa kapolisan.

Ang biktima gikatahong katapusang nakit-an niadtong Sabado sa buntag nga nagtugway sa iyang mga kanding apan gikatahong wala na mahiuli niadtong Sabado sa hapon.

Gipangita kini sa iyang mga anak ug mga silingan ug pagka-Domingo ilang gi-report sa kapolisan nga na-missing ang biktima.

Sa dihang gisuhid sayo kagahapon sa buntag sa iyang anak ang lugar nakit-an ang iyang amahan nga adunay daghang mga pangos ug bun-og sa kalawasan human gituohan nga nahagbong sa pangpang.

Apan ang mga imbestigador misugyot sa pamilya sa namatay nga ipa-ubos sa autopsy ang patay’ng lawas niini aron usab mahanaw ang mga pagduda nga adunay ‘foul play’ ang kamatayon niini.

Human usab ang mga kabanay matud pa dunay mipadayag nga aduna silay gikaaway sa nahisgutang lugar pipila na ka bulan ang nakalabay.