CEBU - Nagkawat-kawat na sa pagpatuman og rollback sa pletihan ang ubang mga bus pasaheroan nga nagbiyahian sa probinsya sa Sugbo bisan pa og wala kini mauyoni sa Cebu Provincial Bus Operators Association.
Ang presidente sa CPBOA, Nick Villahermosa mitug-an dihang nahinabi sa Banat News nga nakadawat sila og report nga dunay ubang mga bus company ang nipatuman na og balik sa P1.00 matag succeeding kilometer gikan sa P1.20 nga maoy ilang gikasabutan.
Matud ni Villahermosa sagad nagkawat-kawat mao kadtong mga mini-bus nga nagbiyahian sa habagatang bahin nga walay pagtugot gikan sa ilang management.
Gikatahong dihang gipatawag ang mga operators niini nasayran nga ang mga drayber ug kundoktor ra maoy nagbuot-buot sa pagpatuman niini.
Hinuon gipadayag ni Villahermosa nga pabiling dili pabor ang ilang grupo sa pagpatuman og rollback sa pletihan tungod kay pabiling mahal ang presyo sa mga spare parts gawas lang kun mokunhod og balik ngadto sa P40 ang litro sa krudo una pa sila mopatuman og rollback sa pletihan.
Subling gipahibalo ni Villahermosa nga pabilin ang P8.50 sa matag first kilometer ug P1.20 ang succeeding kilometer nga pletihan sa tanang bus pasahero-an sa probinsya. – BANAT NEWS