CEBU - Napalgang naglutaw ug patay na sa kadagatan sa barangay Catarman sa lungsod sa Cordova ang patay’ng lawas sa usa ka 73-anyos nga lalaki nga naligo kagahapon sa buntag nga gituohang nalumos.
Ang biktima mao si Manuel Mahinay, biyudo ug nagpuyo sa maong dapit kinsa nakit-an sa mananagat nga si Elesio Guinsay Sacoban,nga maoy mipahibalo sa Cordova Police Station.
Si SPO1 Ebenzer Cadelenia nga nahinabi sa Banat News miingon nga sayo pa sa buntag sa maong adlaw ang biktima nga mibiya sa ilang panimalay sa tuyo nga maligo sa dagat sa maong dapit.
Gituohang giatake kini sa iyang sakit ug walay nakakita kaniya hinungdan nga namatay sanglit way nakitang timailhang may foul play diha sa lawas niini. – BANAT NEWS