CEBU - Gisalikway ug gipanghimakak ni Cebu City Market Administrator Racquel Arce ang mga pagsaway ug pasangil sa mayor sa siyudad Danao nga si Ramon “Nito” Durano III diha sa merkado sa Pasil ning siyudad.
Ang mayor sa Danao namahayag nga ang merkado sa Pasil nahimo nang lublubanan sa mga kriminal ug mangingilad ug walay klarong seguridad.
Kini human usab maablihi niadtong miaging adlaw ang modernong Danao Fish Port nga himuon usab nga drop-off point sa mga isda gikan sa Kabisay-an nga kakompetensya sa Pasil.
Gipasigarbo ni Durano ang ilang bag-o nga giinugurahang fish port nga limpyo, hamugaway ug dunay igong seguridad dili sama sa iyang gihinganlan.
Apan matud ni Arce nga dakong sayop ang pamahayag sa mayor tungod kay giingong dili ingon niana ka ngil-ad ang merkado sa Pasil tungod kay kun seguridad ang hisgutan, malabay lang og bato ang distansya sa bag-ong police station duol sa merkado.
Gisalikway usab sa market administrator ang pasangil ni Durano nga ang usa ka banyerang isda nga itumod diha sa Pasil, katunga na lang niini ang maabot sa merkado.
“Sa akong nahibaw-an, kanang banyera sa nag-travel pa na, daan na nang makuhaan kay dunay mga munisipyo nga pang-itsahan og isda sa mga supplier pangsugba,” matud ni Arce.
Gitataw sa market administrator nga kung dunay mga kriminal ug mangingilad diha sa Pasil posibleng kini anaa sa barangay apan si Arce nakasiguro nga wala kini sa merkado.
Sa pikas bahin gipadayag ni Arce nga dili maapektahan ang supply sa isda diha sa Pasil bisan pa man kung dunay bag-ong fish port sa amihanang bahin sa lalawigan.
Kini tungod kay kadaghanan sa mga isda nga itumod diha sa Pasil giingong nagagikan sa ubang bahin sa Kabisay-an ug Mindanao.
Nagtoo hinoon si Arce nga bisan pa man sa Danao Fish Port, padayon gihapong motumod og isda diha sa Pasil ang mga mananagat sa amihanang bahin sa Sugbu sama sa Daan Bantayan, San Remigio ug ang isla sa Bantayan. – BANAT NEWS