CEBU - Ang pag-atiman sa mga kaso nga may labot sa pangabuso sa kabataan dinhi sa nasud maoy dakong misyon sa Children’s Legal Bureau (CLB) basi sa giintrahang Memorandum of Agreement (MOA) niini tali sa Terre des Hommes Netherlands (TdH-NL).
Gitinguha sa CLB nga mapatuman ang maong proyekto sa dakbayan sa Sugbo, Mandaue, Lapu-Lapu ug Talisay.
Si Atty. Irene Ann Caballes, project coordinator ug Atty. Joan Dymphna Saniel, executive director sa CLB nagpadala og suwat ngadto kang Senior Inspector Jovito Canlapan, officer in charge sa Talisay City Police Station kabahin sa ilang ipahigayong pulong-pulong karong Oktobre 27, 2008 hangtud Nobiyembre 27, 2008.
Ang tuyo ning maong sabotsabot mao nga magkauyon ang CLB ug kapolisan sa dakbayan sa Talisay sa pagtinabangay sa pagpauswag sa prosekusyon sa pangabuso sa kabataan dinhi sa Sugbo.
Nasuta sa CLB nga usa sa dakong problema sa nasud mao ang kalapasan sa katungod sa kabataan nga naglangkob sa pagpangabuso, pagpatrabaho sa bug-at nga mga trabaho, child trafficking, child labor ug prostitution.
Gawas niini nasayran usab nga ang mga turista nga gikan sa nagkalainlaing nasud sa gawas maoy nangabuso sa katungod sa kabataan.
Ang isla sa Sugbo nga gilangkoban sa mga highly urbanized nga dakbayan, component cities ug mga lungsod maoy usa sa popular kaayong destinasyon sa mga turista.
Gumikan niini nainila usab ang Sugbu sa isyu bahin sa sex tourism tungod kay adunay mga turista nga mangita gyud og sexual pleasure ngadto sa mga batan-ong babaye ug lalaki kun ania sila sa Sugbu.
Kasagaran sa mga suspetsado sa sex tourism mga langyaw apan tagsa lang kaayo kanila ang nasilotan. – BANAT NEWS