Amahan naluoy sa anak misulay hikog sa VSMMC

CEBU - Kritikal ang kahimtang sa usa ka amahan human misuway og hikog sulod sa kasilyas sa Vicente Sotto Memorial Medical Center (VSMMC) human wa na makaantos nga nagtan-aw sa iyang 13-anyos nga anak babaye nga nabiktima sa pagpanglugos ug gidunggab ug nalandig sa maong tambalanan.

Ang amahan usa ka 40-anyos, taga lungsod sa Sogod probinsya sa Sugbu kinsa maoy nagbantay sa iyang anak nga nalandig sa maong tambalanan.

Naabtan nalang sa iyang mga kabanay nga naghigot na sa iyang liog og electrical wire ug ang pikas tumoy sulod sa pansayan sa Malnutrition Ward 7 sa nahisgutang tambalanan sa dalan B. Rodriguez barangay Sambag II ning dakbayan niadtong Lunes sa alas 2:30 sa hapon.

Sa imbestigasyon nila ni SPO4 Alex Dacua ug mga kaubanan sa Homicide Section sa Cebu City Police Office ang 51-anyos nga uyoan sa amahang misuway og hikog maoy nakakita kaniya diha sulod sa pansayan nga naghigot na sa iyang liog sa electrical wire.

Matud pa niini nga nananghid ang biktima nga mosulod lang una sa pansayan apan nahibulong nalang sila gumikan kay taud-taud naman kining wala na mogawas.

Hinungdan nga ilang gipugos sa pag-abli ang pultahan sa maong pansayan ug didto ilang nakita ang biktima nga naglingkod nga wa nay panimuot ug nagbitay na sa wire.

Dali nilang gitangtang ang wire sa liog niini dayon nanawag og mga doktor.

Nasayran nga ang biktima gikatahong naguol sa gidangatan sa iyang 13 anyos nga anak babaye kinsa gilugos niadtong petsa 17 ning buwana ug gidunggab sa mga wala pa gihapon madakping mga rapists. – BANAT NEWS