Mga sinakmit sa Speed gikan sa Sto. Niño vendors gipamaligya

CEBU - Mga sinakmit nga mga imaheng paninda sa Santo Niño Vendors Association gikatahong gipamaligya sa mga sakop sa Squatters Prevention Encroachment and Elimination Division (SPEED) pinanguluhan ni Vicente Mercado. Matud sa pangulo sa SNSVA nga si Basan Amora nga gibaligya sa mga sakop sa SPEED ang nasakmit niining mga imahen nga ilang mga tinda.

Kamatuuran niini niingon si Amora nga usa sa ilang mga kustomer ang nipahibawo kanila nga gipamaligya sa SPEED og tag P500 ang imahen nga mokantidad og tag P1,800 kanila.

Ang napundo nga mga imahen diha sa buhatan sa SPEED nasakmit gikan sa mga vendors sukad sa sayong bahin niining tuiga hangtud na niadtong miaging buwan.

Kini gibana-bana ni Amora nga mokantidad na og kapin sa P200 mil apan sa ilang pagsusi niadtong miaging adlaw kini giingong mokantidad na lang og P20 mil.

Butang nga gikahibulong ni Amora ug nakumpirmar nalang niya kini tungod sa maong kustomer ug kun kini mohatag og pinanumpaang pamahayag ilang ipasaka ang kaso batok sa SPEED.

Kusganon hinoong gipanghimakak sa operations officer sa SPEED nga si Gil Vega ang pasangil sa mga sakop sa SNSVA.

Matud ni Vega nga lisod nga mahitabo ang gipasangil sa mga vendors tungod kay walay makahilabot sa mga butang nga anaa sa ilang bodega.

Nagtuo si Vega nga mugna lang sa kahiubos sa mga manindahay ang ilang pasangil tungod kay sila wala mosugot sa hangyo niini.