Poultry worker gitiwasan patay

CEBU - Patay ang usa ka poultry worker sa nagmotorsiklong suspek samtang paingon unta sa iyang trabahoan sakay sa motorsiklo paghiabot sa highway sa sitio Combado barangay Cantuod lungsod sa Balamban niadtong Domingo sa alas 11:30 sa gabii.

Ang biktima nakaangkon og daghang samad pinusilan sa ulo ug lawas mao si Antonio Mahilom, 43, taga barangay Imaculada ug nagtrabaho sa usa ka poultry farm sa maong lugar.

Matod ni PO1 Jose Baldicasa sa Balamban Police dihang nahinabi sa Banat News nagmaneho sa iyang motorsiklo ang biktima ug may nag-angkas nga usa ka Marcel Quindao, 28.

Apan paghiabot sa maong lugar kalit kining gituparan sa nagsunod nga motor nga may duha ka tawo ug ang drayber mipusil kaniya hinungdan sa ilang pagkatumba. Diha-diha gibalikan sila sa maong motor ug gitiwasan si Mahilom una pa miikyas palayo sa lugar.

Ang kapulisan sa Balamban padayon pa sa imbestigasyon pagtumbok sa suspek og pagtino sa motibo sa pagpamusil.  (BANAT NEWS)